831QA
Q: 聽日8月31日你會做咩？
A: 雖然遊行被取消，但我會去港島，你可以反對組織遊行集會，但你唔可以限制人既人身同表達意見自由。雖然警方反對，但我地正正就係要係佢反對既情況下，仍然憑個人意志出黎以挑戰、抵制、削弱暴政既權威。
Q: 會唔會著黑色衫？
A: 會，我明白黑色衫係依家既政治含義，而我覺得表達意見係不可阻撓、不可剝奪既自由。如果因為害怕被政權拘捕而放棄著黑衫，放棄表達出自己既意見，咁樣無異於自制白色恐怖。
Q: 會唔會帶任何武器？
A: 我唯一既武器係爭取民主、自由、公義、真相同人權既堅定決心。決心唔係衝擊或者任何激烈肢體動作，而係每一次投票，每一次遊行既參與，每一日對社會既留意，以及最重要既，我會堅持一世。我諗對手握軍隊、警隊既暴政黎講，佢最怕既唔係人民有限既武力反抗（但唔代表唔重要），而係呢種堅持有一日成為社會主流價值觀。暴政滅亡係因為失去武力，還是失去民心？不妨諗諗。
Q: 會唔會帶任何防護裝備？
A: 首先我相信遇到危險時作出反抗或逃走係人之常情，但我唔會帶任何防具。咁樣唔係因為我天真地覺得唔會有暴力事件發生，而係我覺得係堅持和平表達意見既情況下，如果個人仍然遭受警隊濫暴或濫捕，係進一步突顯政權既不公義，而我個人接受呢個交易，而帶備防具係會減弱左我方既道德力量。我覺得成場運動大體上既和平理性方式，係令中共同警方對使用武力仍然有所顧忌，甚至一定程度上令佢地武力失效既最大原因。
Q: 你點睇衝擊行為？
A: 我諗對政權黎講，最大既衝擊係有咁多人，咁堅持不懈地以有形或者無形既方式爭取民主、自由、公義、真相同人權。
Q: 你點睇大規模拘捕同控告行動？
A: 如果拘捕同控告係可以如政府講「制暴止亂」或者係平息民怨，咁管治香港係唔需要搞咁多野、唔需要咁多部門同機構，警隊請多啲人、起多啲監獄咪得囉。一日唔正視、唔重視民眾訴求，一日無可能真正解決件事。
Search